መግለጺ መሪር ሓዘን
ንሕና ኣብ ሪያድ እንነብር ኣባላት ግንባር ሃገራዊ ድሕነት ኤርትራ ኣዝዩ ዘሰንብድ ወረ መስዋእቲ መራሒና ኣቦ መንበር ዶክቶር ሃብተ ተስፋማርያም ብምስማዕና መሪር ሓዘን ተሰሚዑና። ሞት ንቡር ስለዝኾነ ክትጻወሮ ክትፍን ግድን‘ዩ። እንተኾነ ግን ጉዳይ ኤርትራን ህዝባን ኣብ ኣዚዩ ተሃዋሲ ኩነታት ወዲቁሉ ኣብዘለወሉ ጊዜ ከም በዓል ዶክቶር ሃብተ ዝኣመሰሉ ዓበይቲ ሃገራውያን መራሕቲ፣ ብሞት ክፍለዩኻ ዘይጽወር ጥራሕ ዘይኮነስ ድርብ ሞት‘ውን እዩ።
ፍጡር ኮይኑ ካብ ሞት ዘምልጥ ስለ ዘየለ እንሆ ድማ ዶክቶር ዕጭኡ በጺሓቶ ተፈልዩና። ካብ ኮነ ኸኣ ንስዉእ ዶክቶር ሃብተ መንግስተ ስማያት የዋርሶ፣ ብቐዳምነት ንብዓልቲ ቤቱን ደቁን ከምኡ‘ውን ንኩሎም ብጾቱን ንኩሎም ደለይቲ ለውጥን ድማ ጽንዓት ይሃብ ንብል።
ብጉዳይ ስዉእ ዶክቶር ሃብተን ካልኦት ስዉኣትን ኣብ ሃገራዊ ግዴኦም ዝተመርኮሰ ብዙሕ መግለጺታት ክወጽእ ይከኣል‘ዩ። እቲ ብዝያዳ ነዞም ስዉኣት ኣብ ዘለውዎ ቅሳነት ዝህቦም ግን ነቲ ዝተሰውእሉ ዕላማ ኣብ መዕረፊኡ ንከብጽሕ መድረኽ ዝጠልቦ ቃልሲ ዘካይድ ሸነኽ ምስ ዝህሉ ጥራሕ‘ዩ። ስለ ዝኾነ ድማ ብምሉኣትና ኣባላት ግንባር ድሕነት ኤርትራ ጨንፈር ርያድ በዚ ኣጋጣሚ‘ዚ ዓቅምና ብዝፈቅዶ ነዚ ዕላማ‘ዚ ንምዕዋት ክንቃለስ ምዃና ቃል ንኣቱ።
ግንባር ሃገራዊ ድሕነት ኤርትራ
ጨንፈር ርያድ
14-01-2017
Short URL: https://english.farajat.net/?p=10598
Posted by 
