ዋና ጽሓፊ ማሕበር ሓፈሻዊ ሰርሓተኛታት ኤርትራዊያን: ስርዓት ህግደፍ ኣፍራይ ሓይሊ ኤርትራ በቲኑ

ዋና ጽሓፊ ማሕበር ሓፈሻዊ ሰርሓተኛታት ኤርትራዊያን ኣቶ መሓመድዓሊ ፈቕሒ ነቲ ኣዕናዊ ፈተነታት ስርዓት ኣስመራ ኣብ ምብራቕ ሱዳን ዝግበር ዘሎ ነቒፉ።ኣቶ መሓመድዓሊ ፈቕሒ ኣካይዳን ኣቐራርባን ስርዓት ህግደፍ ባህሊ ናይ ህዝቢ ኤርትራ ምስ ሱዳናዊያን ዘለዎም ዝምድና ዘየንጸባርቕ እዩ ኢሉ።”ክሊቲኦም ህዝብታት ብኩሉ ሸነኻቱ ታሪኻዊ ምትእስሳር ዘለዎም እዩ” ክብል ነቲ ነባርን ጥቡቕን ዝምድና ኣስሚርሉ።

     ኣቶ መሓመድዓሊ ፈቕሒ ትማሊ ምስ ጋዜጣ ኣልሓያት ኣብ ዝገበሮ ቃለ መጠይቕ ማሕበር ሓፈሻዊ ሰርሓተኛታት ኤርትራዊያን መርገጺኡ ኣንጻር እቲ ስርዓት ብምንጻር ኣብ ጎኒ ተቓወምቲ ውድባት ኤርትራ ደው ከምዝበለ ኣነጺሩ።ንሱ ስርዓት ኣስመራ ጥንቂ ናይዘይምርግጋእ ጎራብትና ከምዝኾነ ሓቢሩ።እቲ ስርዓት ብኹሉ ሽነኻt ኩናት ምውልዑ ንኤርትራን ህዝባን ከምዘይርብሕ ብምጥቓስ ማሕበር ሓፈሻዊ ሰርሓተኛታት ኤርትራዊያን ነቲ ኣዕናዊ ፖሊስታት እቲ ስርዓት ኣብ ዝተፈላለዩ ኣህጉራዊ ኣኼባታት ስርሓተኛታት የጋልጽ ምህላዉ ሓቢሩ።

     ፖሊስታት ስርዓት ህግደፍ ንኤርትራን ህዝባን ካብ ዞባውን ኣህጉራውን ርክባት ንጺልዋ ኣሎ ድሕሪ ምባል እቲ ስርዓት ሃዋሁው ሽቕለት ኣልቦነት ንኽፍጠርን እቲ ዝሰርሕ ሓይሊ ሃገሩ ገዲፉ ናብ ካልእ ሃገራት ብፍላይ ናብ ጎራብቲ ሃገራት ተበታቲኑ ምህላዉ ሓቢሩ።