ዓቢ ባርዕ ኣብ ቤት ጽሕፈት ማሕበረ-ኮም ኤርትራ ኣብ ርያድ !
ህንጻ ማሕበረ-ኮም ኤርትራ ኣብ ከተማ ርያድ (ስዑዲ ዓረብያ) ሎሚ ሓሙስ ዕለት 15/01/2015 ኣጋ ወጋሕታ ከም ዝተባረዐ፡ ካብ’ቲ ቦታ ዝበጽሓና ዜና ኣፍሊጡ። እዚ ክበብ’ዚ ኣብ ማዕዘር ዝተባህለ ዞና ዝርከብ ምስ ኢምባሲ ስርዓት ህ.ግ.ደ.ፍ. ጠቢቑ ዝርኸብ ህንጻ ምኻ`ኑ ዝተፈልጠ ኢዩ። ሓደ ካብ ሓለፍቲ ናይ ኢምባሲ ተሓቲቱ ኣብ ዝመለሰሉ፡ ምኽንያት ናይ’ዚ ባርዕ’ዚ ኤለትሪኽ ምዃኑ ገሊጹ። እንተኾነ ግን ብዛዕባ’ቲ ኢምባሲ ዓሚቕ ውሽጣዊ ኣፍሉጦ ዘለዎም ባእታታት፡ እዚ ተረኽቦ’ዚ ኮነ ኢሉ ሰብ ዝሰርሖን፣ ቅድሚ ሕጂ ንኣርበዕተ ግዜ ዝኸውን ዝተደጋገመን ምዃኑ ኣረጋጊጾም። እቶም ኣብ’ቲ ኢምባሲ ብብልሽውና ዝፈለጡ ሓለፍቲ ከም’ዚ መገበሪኦም፡ ሰነዳት፡ ብፍላይ ድማ ምስ’ቲ ኣብ ስዑድያ ካብ ዝነብር ህዝብና ብኣማእት ኣሽሓት ዝእከብ ገንዘብ ዝተሓሓዘ ናይ ሒሳብ ሰነዳት፡ ንምስዋር ተባሂሉ ዝተማህዘ ግብሪ ምዃኑ ደጊሞም ኣረጋጊጾም።
ኣብ’ዚ ክጥቀስ ዝግበኡ፡ ኣምባሳደር ናይ’ቲ ስርዓት ኣብ ስዑድያ መሓመድ ዑመር ማሕሙድ ሓደ ካብ’ቶም ኣዚዮም ብብልሽወና ዝልለዮ ባእታታት ምዃኑ ኢዩ። ኣብ ኤርትራን ምስርን ብዙሓት ኣባይቲ ኣብ ርእሲ ምውናኑ፣ ኣብ ስዑድያን ኩወይትን ከምኡ’ውን ኣብ ሱዳን ምስ ዝሰርሓ ናይ ንግዲ ኩባንያታት ዓቢ ብርኪ ካብ’ቶም ዘለዎም ምዃኑ ዝተረጋገጹ ጸብጻባት ምህላዎም ይሕበር። ብተወሳኺ መሓመድ ዑመር ማሕሙድ ኣባል ስለያ ህ.ግ.ደ.ፍ. ብምኳኑ ኣብ ኤርትራን ኢስራኤልን ዝተፈለለየ ናይ ምስልጣን ኮርስ ከም ዝወሰደ ዘረጋግጹ ሓበሬታታት’ውን ኣለዉ።
“ድሕነት ህዝብን ሃገርን ልዕሊ ኩሉ” !
ቤት ጽሕፈት ዜናን ባህልን
ግንባር ሃገራዊ ድሕነት ኤርትራ
15/01/2015
Short URL: https://english.farajat.net/?p=9277
Posted by 
