ቲዃ፡ ሰልፋ አርባ ያኸኒትሪ 65 ኣመሪ ጃብ

እንሽኽድ ኤርትርይ ሕርየት መታን ለመለም ብርፍ የሪ ግርጋ።

እክባ ፈርዕ ሙርቛ ብሊኑኽ ኤርትርያ/ሆደር ስጝድ ስክራኽ ቖል።

ንኪ፡ ሰልፋ ግርጋ አርባ ያኸኒትሪትል ሰውረት ኤርትርይኽ ስላሕድ ለመለም ተር ይረሪ ግርጋ ግን። አመሪ ሺባ ሕሽምድ እልብድኑላ መንደርትነኩን። እነ ግርጋ ኒሂትል፡ ይነ እኽር ፍዳ ደኻኽ ለመለም-የንቱራ ሓምድ እድሪስ ዓዋተ` ሲ መርሕስተው እንሽኽድ ለመለም ተር ሱኑ: ጀበረቲት(ናጽነት) ዳሕና ደርብድ ወንቀርኖ አርድኖላ ገረስኒ፡ ሽራኽዲ መረራኽዲ ወክት አዳኽ መንዱቅ ምኽርድኖ ለመለም ይኒል ቱድኖ ቀሰብስኑኽ። ዲመሲ አካኽ ኤርትርይ-ቁር ና ናይ ናክርሽምድ ናቅስድኖ፡ ጊራ አዳል ዱኺል ተረገስኖ፡ ሰልፍ ለኸት ናገሽ አወት ተኮድነድ ለመለም ብርፍ የት በሸርድኑክ፡ ኒን አክነዲን ሰልፍ ግርጋ ያኸኒትሪ ህጃም በሄር ሻኽራሪዲ ካብሪ፡ ናውክ ለመለም የንቱታት ኤርትርይ-ቁርዲ ናፈተት አኽኖ ዲማ ሕሽምድ እልብዱኑላ መንደርትረት እሰኽላ ኒን ግን።

እነ ሕሹሚ ግርጋ ኒሂትል፡ አምብሮጦርየት ኢትዮጵይኽ ኤርትርያት ሒልድ ኒሻክነስ ከለብርነሊ ይኖ ፡ መንዱቅ ምኽርኖ ና ናይ መታን ሰውረት ተርሰው ሓጥራን ለመለም-የንቱት፡ ኤልብድኖኽር ና ፊና ሚኽርስጝን ይና መደሲ ቛልኖኽር ታና እስነኩን።

እና ለመለም የንቱት ና ሀደፍ ሌጋ ስታት ዓውቲስድኖ እርጉኽ፡ ንድ መታን ናውክትዲ ናማልዲ ናሪሕዲ ፍዳ እኽድኖ ጉድድጋኹሎም ኔን ግን።

ናውኻ፦

1፡ ኤርትሪ ብሪልድር፣ ባሓርልዲ፣ ሰሚልድር፣ አምበረጥርየት ኢትዮጵይኹሲ ማሑቁሮ ፍድና፣

2፡ ኤርትሪ ቑር ና ብሪል አርደት አኽድኖ፣ ሕሳንዲ መቅርሕዲሲ ናትክ እኩለድ መርሓኹዲ መቅርሓኹዲ ፋሪዕ (ዲሞክራስያዊ) ፍሪርኖ ጉደናኹዲ ገምደናኹዲ ሜሪ ዋኒሮላ ሓለኖ ለመለም ይድኖ ዲጉኑኹ።

ለመለም የንቱት እነ አወት ገሞ ህንበውሲ ዓውቲስድኖ ሰልፋ ግርጋ አርባ ያኸኒትሪትል ቲዃ ሰውረትሪት ትልጭ ሲኒኹ። ሰኾረጝን(30) ኤሜታት ለመለም፡ ሰልፍ ሓርነትድ (ተጋድሎ ሓርነት ኤርትራ) ብርፍ ዮ ደንቢረድ ህዝባዊትሲ (ህዝባዊ ግንባር ሓርነት ኤርትራ) መርሕስቴኽ፡ አባይ አምበረጦርይየት ኢትዮጵኹሲ 1991 ይና በለድልድ መሓቑሱኹ። ኒደንቢ ረፈረንደም ደርብድ እስተ ናውክ ኤርትርይን፡ ይነ ሕርየት ጀረብነኩን ይንነዲን ኤርደት ይና በለዲ ኤርትሪሪ ኣኽኑኹን። ኒን ኒሹሺ ዓውተ በሄር ግን፡ ኒስ

ከለብርኖ ተብድኖሉ፣ ተከውኖሉ ሻኽንኹን። ይነ ለመለም እን ሊጘሪ እስታት ኮዉታት ኤርትሪዉ ሑር እስና ህግደፍድ ጠለምስነዲን ለመለም ተለለይሮ ናንኽር ደው ዮ እላ። እና ሕጃም በሄር ሻኽረሪ ግርጋ ኒሂትል፡ ማእኮት ለመለሙኽ ሐደስድኖ ወንቀርስነሪ ግርጋ ግን። እና ደከው 35 አሜታትል ፊና ለመለም የንቱትኹሲ ጠለሞ ከታባ ህዝባዊር መራሒራ ኢሰያስ አፎወርቂ ኒ ጨርስኻ እንሸዎ፣ መጢትኖ ለመለም የዉ እክብሲ ዳገኖ ቂጦሮስ መንዱቕ ኤብድ ኮፍ የትሉ ናዉክ ኤርእናኹ ግን።

ምስኽር ጀረብድጊና መንደርትናኹ ሜሪ ህግደፍ ሩኽ ተከልሰንትል ላ ቂር ረይሓትር ኪዳ ቂር ገንጅኖ እሊኒ። ሓርብ ከኤር ሱቛና ስደት ከምሲን ሰና ገሙና 35 ኤሜታት ዶኮ ህንበኩ።

መሪ ህግደፍሩኹ እከክ ኤርትርይው ህግደፍር ሕክምሲ ናአበይትናስ ሚኺርድኖ ዲማ ሓዳይስ ኣጀንዳታት ተተቆክ። ሓርብ ጫሕገሮ ብርፍሰኹድ ውሪካ ሻሎት ዲሂስግናኽር፣፡ አርባ አንካ(5) አመራ 2018 ትልድ፡ በለዲት ንርትክ ንር በርዲ ባሓርዲት ደክሶ ኡኒል ሳንኪታኽ ወጡን ንኪ ኢትዮብየዲ ህንባኹ ጨገም ኒ ኡዋኹሎም ገሽ ግን።

እና ገሪ ናሽሽዲ ብርዲ ብቅተላ እርስረሪ በለዲት፡ ኤሪውድ ደክሶ ኡሮላ ወንተተረክ ወጠናኽ፡ ኢሰያስ አቢይ አሕመዲ አኾ፡ ተደምረናል ዩስትጙ ቋልጋኽ እላ። ኤርትራ 35 ኤሜታትሲ ጀበረት (ናጽነት) አርኖ ወክትልድ ኒኪር ቂር ኣዋጃታት መርሕሰቲ እንኩቲ። እክክ ኤርትሪዉ ፍሪርኖ ሰቀለናኹዲ ገምደናኹዲ መሪ እላ። ኒስ እና ግርጋ ባሕሮ ያኸንትሪትል ዓገብ ዩኖኽር ለመለም ዩኖኽርሉ ይና ዋጅብ ግን። ፋሺሽቲ ኢሳያስ አፍወርቂ ኣን ኢዲኒል ዋኑ ኪሰሪ ቛልደኒ ዮ፣ ጀመረትና ምኽርናኽር ህንብነኩን። ኒ ዋኑ እና ድገ ደባንዲ ነብረዲ ኤርቶ ግን ዪሮ ሓሰብና ዪና ሹቲ ምልና ግን። ኒድክልድ እና ጋይትኖ ህንብናኽር ዪን እኾኣርስናኹ ልጝንዲ ዲግዲት ደንቢራ ቁልሕ ዪኖ ቋልነን ኒ ለበካ እሲኖ ይናጃብል ኮፍ ይርድና።

ኢትጵዮቢው መርሔት ባሕርሲ ኤርኖ ዶከዉ ግምል በስክዲረዲ ዖነዲ ላ ክሰሪል መርጃኹነድ ዪና ብሊና መቕጠንሊ ህንባኹ ሓለገት ግን። ደአም ኢሰያስ ኒ ቂጦሪ መታን ‘’ተደምረናል’’ ዮ ሊጘር ጉሮ እሰኹሉ ኒ ግን። ንኪ ዪና በሓር እስጊን ዪኖ ዪና ኣባይ ኮኹሲ ሚኺርኖ ኣባይ ጎርዲ እንሽኽል ቱኖ ደለምኒል ህንብነኩን። ዪና ብረዲ ይና ባሓርዲ ደኩስኖ ኡኖ ኡናኽር ኣኽኒ ኮዶ ለጛ ኤባይትስ ዲሂሳኹ ደርብ ሻኽኖ ለመልለም ዪነን ግን ዪና ሕርየት ኒ መልኣኹ። ለጘክ ኣፋይቲ ግን ናልድ ላኹ ኪዳኹ እላ እማ ዪና ናንትሲ ላኹ መደብል ቱስጝኒ ይና ከዉዲ ይና ብረዲት ተከዉንሊ ናዉክ ፍትሕ ጀረበዉዲ ለሓምኖ ላ ገሽ ሻማ እስነ ለመለም ዩኖ ጀረብደኩና። ንኪ እና 65 አመሪ ሰውረት ኤርትርይኽ እንሽኽድ ተር ያኽ ግርጋት እልብድኑ፡ ኢትይጵይ ሜሪ ይነ ብረስ ሒልድ ወንተሮ ሻኽሮ ንር ክብርሲ ደፈርዶ ሊጘር ኢትይጵይ ሕክምሊ ቱቶ ፖሊሲታት ሸፍሸፍኖ ኒት ግብርሊ እርግስድኖ ከደመዉሲ መረርድኖ ወጋህ ይኖሉ ሻኽንኹን፡፡

ደአም ቅረናት ፍትሕድ፣ ይነ ናይሲ ከበርዳኽ አኾ፡ ባሐር ኤርትርይኽድ ነፍዕስትያ ጀርበኩን ያኽ ወንቀራ አገባብድ ጀረበኩን ያኽ አከን፡ ይን ኒስ ገበበግነትሉ ኤርእሮ ሻክ። እነ

ኤርትርይ ዳግሊ ሊጘር ወንተርኖ ወረርድኖር ጅርብ ኢሰያስ አፎወርቂዲ ኒ ማዓኛ ህግደፍዲ ስልፍድ ወንቀርሰንቲ አከነት ኤርእድኖ ሻኽኑኽ።

እነ ስላሕ ምኽርዶ ለመለም ብርፍ ህጃም በሄር ሻኽረሪ ካብሪ ግርጋ ኒሂትል ኣኽኖ፡ ይነ ማእኮት ሐደስድኖ፡ ናትክ ኤርትርያ-ቑርሲ ሆደ ምርቛ ብሊናኽ ንር ሽጘና ስክሰቲኩም።

ፋሪዕ (ዲምክራስያዊ) እክባ ሙርቛ(ብሄር) ብሊነሪ እና ለመለም ኒን ድገት ኣባይ ከደኑኹልድ ሓረርኖ እስናኹ ለመለም ኣኽላ፣ ጀበረት ደንቢ ዪና በለድ ቑር ጠለምኖና ናልድ ሓረርስኖ እስናኹ ለመለም ኣኸት ኤርኖ ሻኽንኹን። ዪን ብሊን ይና ብሪል ዪና ዓዋዲት ኣኽን ይናብረስ ዪና ቑርሲ ሑር እሲኖ ይነሰና ዕሙጫን ይናሻንዲ ኣኽኖ ለመለም ይነኩን እንኩንኹን። እመሪ እና ደኳኹሰና ጠለምስግኒ ሆደ በላይንሲ እክብሮ 2009ትልድ ዲባ እስረ ይሮ ለመለምል ህንበቲ። መርቛ ብሊን ሆደር ጨር ኣኽትኖ 2009 ሽጝኑ ዲኒኹን። ኒልድድ ሻሎታት ሆደር ቲዃስ ሻክድኖ እንተወረቢል ኤተይድኖ ወረበስ ሑር እሲዲነ እንታ ዲበድ መርሕሳኹዲ ምቅርሕሳኹዲ ናይ ናትል ለመለም ይትኖ ሽጘቲኩም።

ሆደ፣ ሻን ውድባትዲ ሻኽናኩ ወንድናርድ እቑቱ ዪኖኩም። ጃቢቶ ቱናኹ ባይቶ ኤርትራ ንደሞክራስያዊ ለዉጢ ኣኾ ደርብል ሓሳብድ ፈለይስግኒነዲን፣ ዪነት ተክለበዉዲ ወንድናር ኤርትራዊ ሃገራዊ ስሙር ግንባርዲ እስኒኹን፣ እና ሽማ ኒል ዋንትኑ በሄር ሻማ ጀረብደትና ዪና ማእኮትል እርግነዲን ኤርዊዲ በሀር ሻማ እሲኖ ኮድግነዉ፣ ህዝባዊ ዲሞክራስያዊ ሰልፊ ኤርትረድ፣ ቕይሕ ባሕሪ ዓፋር ዲሞክራስያዊ ዉድብዲ ግን ናዲ ቻርትረድ ተስመማዕንነዲን ዋዕላ እስነ ሻማ ፖሎቲካዉያን ሓይልታት ኤርትራ ያኹ ለጛ ኢመሪ ጃብ ተከልኑኹን። ናግር እና ሸዃ ዉድባዲ ህንብነኩን። እና ፖሎቲካዊ ሓይልታት ኤርትራ ስጝድ ፋዉ ኩቱባንድ ኣዋጃንዲ ይን ህንብነኩሎም። ሆደ ሙርቛ ብሊናኽ ኤርትርያ እከክ ናውክ ይነ አጝዋርዲ አኽን ኢዲናይሊ መንደርተው እከክዲ፡ ሕሳንድ መንደርትኖ ክምነት እምነኩን ኒን ኣኽሮ ኣከን ደኣም ‘’ናይ ብሊናኹሲ’’ ከለብረዉ ኣክድኖ ሻኽኑኹ።

ሆደ ምርቛ ብሊኑኽ፡ ላኹ ጨራ ፖሎቲካ ሒል ኤርትርይኹ ኒ አክና ስበትድ፡ እዳናኽ ዓቅም እስነ ላሕመትድ፡ ይነ ጀበረቲትዲ ይነ ሹር-አርደት ይነ አክናዲ፡ ላናር ይነ ሸዓቡኽሲ ተከውኖ ብርፍ ያኸኒትሪትል ድምኖ ዪና ማእኮሲ ሓደስነኩን። ወደሓንኩም።

ሰልፋ ግርጋ አርባ ያኸኒትሪ ዲማ እልብርስሩ በሓርስሩ መንደርትርኒሪ!!

ይነ መታን ፍዳ ደከው እከክ ዲማ ደማይ ናስጝ ጉ መንደርትኒ!!

ፋሪዕ (ዲምክራስያዊ) እክባ ሙርቛ(ብሄር) ብሊነሪ-ኤርትረያ 31 augustus 2026