ጋዜጣዊ መግለጺ ኣቦ መንበር ፈጻሚ ቤት ጽሕፈት ኤርትራዊ ዲሞክራስያዊ ኪዳን

ብዛዕባ’ቲ፡ ተቓወምቲ ውድባት፡ ንኤርትራ ካብ’ቲ ስርዓት ሓደ ውልቀሰብ ባዕሉ ዝሸመማ ዓዘቕቲ ከውጽኣ ዝኽእል ፕሮግራም ይኹን ርእይቶ የብሎምን ዝብል ኣዘራርባኡ እንተዀይኑ ድማ፡ ነዚ ዝስዕብ ሓቅታት ክንጠቕሰሉ ንፈቱ። ኣብ ኵሉ መዋእላት ናይ ቃልስና፡ ኣብ ሃገራዊ ናጽነት ዝተሰረተ፡ ንትካላዊ ኣሰራርሓን ህንጻ ሃገርን ዘማቻችእ፥ ንቍጠባውን ባህላውን ማሕበራውን ልምዓት ሃገርና ባብ ዘርሑ፥ ንውሽጣዊ ሽግራት ኤርትራ ብሰላማዊ ኣገባብ ንምፍታሕ ግብራውን መድረኻውን ሃገራዊ መደብ ዕዮን እማመታትን ከቕርቡ ዝጸንሑ ተቓወምቲ ውድባት ኤርትራ ደኣ’ምበር እቲ ስርዓት ኣይኰነን። ከም’ዚ ዝኣመሰለ ሓሳባት ካብ ፕርግራም ይኹን ራእይ ዘይብሉ ሸነኽ ክመጽእ ይኽእል’ዶ!!!? ኤርትራ፡ ኣብ ትሕቲ ምምሕዳርኩም ትሓልፎ ዘላ ንመላእ ዓለም ግሉጽ ዝዀነ ሃለዋት፡ ፕሮግራም ይኹን ራእይ ዘይብሉ ተባሂሉ ዝኽሰስ ሰልፍኹም ድዩስ ወይስ ተቓወምቲ ውድባት ኤርትራ!!!? እቲ ተቓወምቲ ውድባት ዝሓንጸጽዎ መተካእታ ናይ’ቲ ንህዝቢ ዘባህርርን ኣደዳ ኣጻምእ ምደረበዳታትን ዓሳታት ዝገብር ፖሊሲታትኩምን ተግባራትኩምን ዝዀነ ራእይን ፕሮግራም’ን እኹል’ዶ ኣይኰነን!!? እዚ ዝርአ ዘሎ ህድማን ስደትን መዐቀኒ ናይ ተቐባልነትኩም ኣብ ህዝቢ’ዶ ኣይኰነን!!? ህዝቢ ኣብ ጐድኒ ናይ ተቓወምቲ የለን ምባል ብዝምልከት ግን፡ ናታ ገዲፋስ ናይ ሓማታ ዘብል ኢዩ።

ሃገራውን ዲሞክራስያውን ሓይልታት ተቓውሞ ኤርትራ ኣብ ህዝባውን ፖለቲካውን ዲፕሎማስያውን ዜናውን መዳያት ብዙሕ ዓወታት ኣብ ዘመዝገብሉ፤ ናይ ኤርትራ መድረኻውን መጻእን ሕቶታት ዝምልስ ኪዳንን ቻርተርን ወኒኖም ብሓድነት ንእዋናዊ ዕማማት ኣብ ዝገጥምሉ፤ ዲሞክራስያዊ መተካእታ ዝዀነ ስርዓት ንምትካል ቆሪጾም ኣብ ዝተበግስሉ፤ ምስ ኣህዛብን መንግስታት ጐረባብቲ ሃገራትን ኰይኖም ናይ ሰላም ዓንድታት ኣብ ዝድኵነሉ ዘለዉ እዋን፡ ከም’ዚ ዝዓይነቱ መግለጽን ጸለመን ምውጻእ፤ እቲ ስርዓት፡ ካብ’ቲ ዝሓለፈ ክፍለ-ዘመን ከምዘይወጸን፡ ንሽግራት ሃገርና ክፈትሕ ዝኽእል ፖለቲካዊ ብስለት ከምዘይውንን፡ ጌና ውን ሃገራዊ ግቡኣቱ ክስከም ድልውነት ከምዘይብሉን ኢዩ ዘመልክት።

ኤርትራዊ ዲሞክራስያዊ ኪዳን፡ ኣብ ሃገርና ናጽነትን ፍትሕን ግዝኣተ-ሕግን ዲሞክራስን ክሳዕ ዝነግስ ቃልሱ ቀጻሊ ምዃኑ ደጊሙ የረጋግጽ። ከምኡ ውን፡ እቲ ስርዓትን ንሽግራት ናይ ሃገርና ብሰላማዊ ኣገባብ ንምፍታሕ ድልውነት እንተደኣሃልይዎ፡ ብትብዓት ኣብ ቅድሜናን ኣብ ቅድሚ ህዝብን ደው ክብል ንጠልቦ። ንፈተውቲ ሰላምን ፍትሕን ዲሞክራስን ዝዀኑ ሓይልታት ከኣ፡ ህዝብና ንዝተሰልበ መሰላቱ ክመልስን፥ ግዝኣተ-ሕጊ ዝነገሳ፡ ሰላምን ብልጽግናን ዝሰፈና ቅዋማዊት ሃገር ክሃንጽን፡ ኵሉ ዝከኣሎም ደገፋት ከበርክትሉ ንጽውዕ። ከምኡ ውን፡ ነቶም ነዚ ቅኑዕ ጐደና’ዚ ሒዞም ዘለዉ ኣህዛብን መንግስታትን ዞናና ከኣ መጐስና ንገልጽ።

ሑሴን ኸሊፋ

ኣቦ መንበር ፈጻሚ ቤት ጽሕፈት

ኤርትራዊ ዲሞክራስያዊ ኪዳን

17.06.2006