መበል 5ይ ዓመት ሰላማዊ ሰልፊ ኣብ መልበርን

ሓው መሓመድ ኑር ኣሕመድ፡ ናይ ቀደም ኣምባሳደር ስርዓት ኤርትራ ኣብ ቻይናን ሰክረተር ኤርትራዊ ዲሞክራስያዊ ኪዳንን፤ ሓው ብርሃን ሸዲ፡ ኣቦ መንበር ማሕበረ-ሰብ ኤርትራውያን ኣብ ኣውስትራልያ፡ ከምኡ ውን፡ ሩዓ ማሕሙድ ሓሳብ፡ ነቲ ብጕዳይ መንእሰያት ዝግደስ “ኤርትርያና” እተባህለ ማሕበር ወኪላ ንገበናዊ ተግባራት ስርዓት ኤርትራ ዝዅንን መደረ ኣስሚዖም። ሓው ኣሕመድ ኣቡበከር ድማ፡ ነቲ ሰላማዊ ሰልፊ ተወሳኺ ድምቀት ዝሃበ ደርፍታት ናይ እንግሊዝ ብምቕራብ፡ ንዕላማታት ናይ’ቲ ሰልፊ ናብ’ቶም ኣብ’ቲ ሰላማዊ ሰልፊ እተሳተፉ በሽሓት ዝቝጸሩ ኣውስትራላውያን ከምዝበጽሕ ገይሩ።

ኣብ ርእሲ’ሲ፡ ሰላማዊ ሰልፈኛታት፡ ብኣህጕራዊ ሰብኣዊ መሰላት ዝቐረቡ ንስርዓት ኤርትራ ዝፍጽሞ ዘሎ ግህሰታት ሰብኣዊ መሰላት ዘቃልዑ ወረቓቕቲ ኣባዚሖም ዘርጊሖም። ከምኡ ውን፡ ብሓደ ኣውስትራልያዊ ጋዜጠኛ እተቐርጸ፡ ኣብ መደበር ሳዋ ኣብ ልዕሊ ደቂ ኣንስትዮ ዝፍጸም ናይ ስጋዊ ርክብ ዓመጽ ዘቃልዕን፤ ኢሳያስ ምስ አይ.ቢ.አስ (ABS) እተባህለ ናይ ተለቪዥን ማዕከን ዝሃቦ፡ ኣነ ብህይወት ክሳዕ ዘለኹ ካብ ስልጣን ክእለ ኢላካ ምሕሳብ ዘይከኣል’ዩ ክብል ዝሃቦ ቃለመሓትትን ዘርኢ ፊልም ኣርእዮም።

ዊልያም እተባህለ ሩዋንዳዊ ደራፋይን ገለ ኣውስትራላውያን ደረፍትን ውን፡ ንፍትሕን ናጽነትን ሰላምን ዲሞክራስን ልምዓትን ዝጽውዑ መዛሙር ኣስሚዖም። ንመጀመርያ ግዜ ድማ፡ ወኪል ኣምነስቲ ኢንተርናሽናል ኣብ’ዚ ሰላማዊ ሰልፊ ተሳቲፉ ነይሩ። ከምኡ ውን፡ ወኪል “ማሕበር ቪክቶርያ ጸረ ዓዛብ” ኣብ’ቲ ሰላማዊ ሰልፊ ተኻፊሉ ምንባሩ ተፈሊጡ ኣሎ።

ብኻልእ ሸነኽ ከኣ፡ እዚ ኣብ ኣውስትራልያ ብስርዓት ኢሳያስ ን6ይ ዓመቱ ዝተኻየደ ፈስቲቫል፡ ንመጀመርያ ግዜ ኣብ ውሽጢ 2 መዓልታት ምዝዛሙን፡ ነታ ክፍሊ ባህሊ ዝመርሕ ዝነበረ ሓላፊ ኣብ’ቲ ፈስቲቫል ዘይምስታፉን ቍጽሪ ተሳተፍቲ ኣዝዩ ውሑድ ምንባሩን ተፈሊጡ ኣሎ። ቅድሚ ሕጂ እቲ ፈስቲቫል ንሰለስተ መዓልታት’ዩ ዝቕጽል ዝነበረ። ኣብ ርእሲ’ዚ፡ ኣብ ውሽጢ’ቲ ፈስቲቫል ዝካየደሉ ዝነበረ ኣዳራሽ፡ ንዕላማታት ናይ’ቲ ሰላማዊ ሰልፊ ዝድግፍን ዝጻረርን ክትዓት ከምዝተኻየደ ዖና ዝተባህለ ናይ ዜና ማዕከን ሓቢሩ።

እዚ ሰላማዊ ሰልፊ’ዚ፡ ንሓሙሻይ ዓመቱ ብዘይምቍራጽ ዝካየድ ዘሎ ሰላማዊ ሰልፊ ምዃኑ ይዝከር።