ዝኽሪ ንተ. ኣድሓነት ዓንዱ

ማሕላ ናይ ማዕርነት ነሕዋታ ዘውረሰት

መን’ያ ኣድሓነት ዓንዱ ካብ እግራ ናብ ርእሳ?

እታ ተጋደለት ኣብ ላዕሊ ኣብ ከበሳ  

እታ ተቓለሰት ንመሰል ኣብ ባርካ

መን’ያ ኣድሓነት ዓንዱ ኣሎዶ ዝነግር?

 እታ ምስ ብጾታ ንመስል ትጭድር  

ዘይከፈልናኪ’ኮ ብዙሕ ዕዳ ኣለና

ኣይርስዖን ኣነ ዕላልና ናይ ካርቱም

ብዛዕባ ሃገርና እቲ ዘየብል ትም

ዓሚቝ ክትዓትና ዘሎን ዝቐደመን

ተሪር ዘረብኣ ከም ዋዕሮ ተጒረምርም

መልእኽታ ሰዲዳ ብስሓቕ ትድምድም  

ልዳት ናይ ኣሕዋትኪ ፍጹም ዘይጠፍኣኪ

መዕበይና ኣመል ከምታ ናይ ቀደምና

ብዛዕባ ዓድና ሓደን ክልተን ኢልና

እስከ ልቢ ንግበር ንግደፎ ምዕዝምዛም

ብቐዳማይ ተሰፎም ሕጂ ድማ ኣድሓነት

መንእሰይ ኣብ ዓዲ መንእሰይ ኣብ ስደት

ማያ ከይጥዓምኪ መሰል ጎዲሉና

መን’ሞ ይኽሰሶ ነቲ ዝወሰነ

ንሱ’ዩ ኰይኑና ህልዋት ንሳነ!!!