ሃገርና እናጠለቐት.. ኣይንኹን ተወላወልቲ

በዓል ኣቦይ ገራህቱ

ኣቦና ኣይትኹኑ

ህዝቦም እና ተሳቐየ

ዓይኖም ዝዕምቱ

ምእንቲ መረባዓት

ሕልነኦም ዝሸጡ

ዝነገሰ ንጉሶም..  ስሱዓት

ናይ በለጽ ወጣጡ

 መኻን የእምሮኦም

ምስሉያት ወትሩ ዓያሹ

***

በዓል ኣደይ መዘንግዕ

ኣደና ኣይትኹና

ደቀን እናጠለቑ

ተሸሊመን ዘኳድዳ

ኣልቦ የእምሮኤን

ብቀሊል ዝታለላ

መወልቲ ሸፋቱ

ኮስኪሰን ዝናቢያ

ዘደንግጻ ፍጡራት’የን

ናይ ድንቁርና  ኣርማ

***

ዘስተንትን.. ዘገርም’ዮ

ድሕሪ ነጻነት መሬት ኤርትራ

መንእስያት ሃገረይ

ክሽየጡ ክልወጡ ከም ኣቕሓ

ሕሱራት ቅያር ኣቕሑ ኮኑ

ዝነግዱሎም ኣረማዊያን ደላላ

ማንጆስ..  ጸጥታ ሱዳን

 በድዊን ሲናይ.. ራሻይዳ

ናይ ኩሊት ሃዳኑ ዝቀባበልዎም  

 ብህንቍውታ.. ብዘይ ንሕስያ

*****

ቅድም ነሮም

ነጻነትና  ዝሸጡ ንባዕዲ

ሕሱራት.. ከዳዓት

ንጃንሆይ ተምበርከኽቲ

ስኽፍ ዘይብሎም

ክብረቶም ሸየጥቲ

ታሪኽ ይድገም’ሎ

ድሕሪ’ዚ ኹሉ መሪር ቃልሲ

በዞም ዉርዚያት መጓበብቲ

ንጥፍአት ሃገር መወልቲ ደገፍቲ!!!

***

ንምብርካኽ ዝተፈጥሩ

ናይ ዝልመት ጸገንቲ

ካብ ታሪኽ ዘይማሃሩ

ወትሩ ኣድሓርሓርቲ

ትማል ምስ ወያነ

ሎሚ ምስ ዴምህት መሻርኽቲ

ስሱዓት… ጠላማት

ንደም ስዉአት ዋጋ ዕዳጋ አዉረድቲ

ወረስቲ ናይ ኣበር

ወትሩ ተገዛእቲ

***

ወዲ ኤረይ.. ኣስተባህል

ንቃሕ… ጽባሕ ከይትበኪ

ተወደብ… ተቃለስ

ኣድሕና ዓድኻ.. ካብ ውራ ባዕዲ

ኣይንጥለም ሕድሪ ሰማእታት

ንሓሉ ልዑልነት ዓዲ

ሓቢርና ንኽተት… ንቃወም

ነድሕና ሃገርና ካብ ጸድፊ

አይንዘንግዕ ሃገር ክትዝመት

ኣይንኹን.. ተወላወልቲ

*****

ኤረየ…  ኤረና

መዓስከር ዴምህት

ኮይና’ላ.. ኤርትራና !?!

ክብርና በሪሱ.. ሓሳረ መከራ ሰፊኑ

ጭንቀት በርቲዕዎ.. መንእሰይ ተሰዲዱ

ሸፋቱ ህግደፍ-ዴምህት

 ኤረና ጎቦጡ

ብመደብ.. ክቀትልዋ ተዓጠቁ

ሃገርና ወሪሶማ.. ነጻነትና ዳህሰሱ

ዑና ኮነት ሃገር.. ኣልቦ ባዶ ከንቱ

***

ናይ 70 ዓመታት

መሪር ሃገራዊ ቃልሲ.. ዝትሰግረ

ደም ስውኣትናን መስዋእትናን

ከይከውን ዝኽሪ.. ምህውታተ

ነዚ ኣስጋኢ መድረኽ

ንመክቶ ሓቢርና ብሓደ

ሃገር… መንፈስ እያ መንነት

ንዓቅባ… ብጥንቃቀ

 ብሸፋቱ ከይትጠፍእ

ከይትኸዉን ታሪኽ.. ነሩ.. ነበረ

***

ዓገብ.. እወ ዓገብ.. ንበል

ከይጠፍኤት ከላ ሃገርና

ፍሽልቲ ሃገር.. ገሃነም ገሮማ

ተድህብ’ላ ንህልቀታ

ዕዉራት ጸማማት አይንኹን

እና ረኤና እና ሰማዕና

ብደም ጀጋኑ ዉፉያት

ዝተረኽበት ናጽነትና

ንዓቅባ ልዑልነትና.. ንቃለስ

ክብርና’ያ.. ሂወትና… ሓበና… ሓላልና

ብ/ ሙሓማድ ሳ. ኣሕማድ

27/12/2014

Short URL: https://english.farajat.net/?p=9169

Posted by farajat on Dec 27 2014 Filed under Articles, Poetry. You can follow any responses to this entry through the RSS 2.0. You can leave a response or trackback to this entry