ኤርትራ ከም ተራ ተዛታይትን መንጎኛን ኮይና ትጻወት ኣላ ክብል ሓደ ላዕለዋይ መራሒ ቢጃ ከሲሱ።

ብኻልእ ሸነኽ ጋዜጣ ካርቱም፡ ዶክተር ሙስጣፋ ዑስማን እስማዒል፡ ኣብ ኣስመራ እትው ምስ በለ ኣብ ዝሃቦ ጋዜጣዊ መግለጺ፡ ዝርርብ ሰላም ምብራቕ ሱዳን ብዛዕባ ምክፍፋል ሃብቲ ምስ ወድአ፡ ናብ ጸጥታዊ ጕዳያት ክሰጋገር ኢዩ ከምዝበለ ገሊጻ። ብኻልእ ወገን፡ ኣቶ የማነ ገብርኣብ ሓላፊ ዝርርብ ዘተ ሰላም ምብራቕ ሱዳን: ብዛዕባ ጸጥታዊ ጕዳያት ዝግበር ዝርርብ ሓደ ሰሙን ዝኸውን ጊዜ ክወስድ ምዃኑን፤ እቲ ልዝብ ብጽቡቕ ይቕጽል ምህላውን ከምዝገለጸ እታ ጋዜጣ ሓቢራ።

ስርዓት ኣስመራ ኣብ ጉዳይ ዝርርብ ሰላም ምብራቕ ሱዳን: ካብ መጀመርያ ኣትሒዙ ቀንዲ ተዋሳኢ ንምዃን ስለዝተጓየየ፤ ኣአንጋድን መንጎኛን ክኸውን ከምዝበቕዐ ዝዝከር ኢዩ። ፖለቲካውን ማሕበራውን መራሕቲ ጉባኤ በጃ ድማ፣ ኣብ ልዕሊ መንጎኝነትን ብቕዓትን ንጽህናን ስርዓት ኤርትራ ዘለዎም ጥርጣረን ስግኣትን ኣብ ዝተፈላለዩ ኣጋጣሚታት ክገልጹ ጸኒሖም ኢዮም። ብፍላይ ድማ ኣብ’ዚ ዳሕረዋይ እዋናት፡ ካብ ውሽጣዊ ቅልውላዋቱን፡ ካብ ዞባዊ ተነጽሎን ንምውጻእ ክገብሮ ዝጸንሐ ምንቅስቓሳት፡ ከምኡ ውን፡ ኢሳያስ ኣብ’ዚ ቀረባ እዋን ኣብ ዝሃቦ ጋዜጣዊ መግለጺ፡ ናይ ዞናና ኣርሓ ኰይኑ ንኽርአን፤ ንሓባራዊ ዕብየት ዝዓለመ ተበግሶታት መራሕቲ ናይ ዞናና “ተበግሶ ናይ ጐርሓት” ኢሉ ከቈናጽቦ ምፍታኑን ንጥርጣረታቶምን ስግኣቶምን እናኣዕዘዞ ከምዝመጸ ዝዝከር ኢዩ።