ኣግዳስነት ስርዓት ኢሰያስ ኣብ ዞባውን ኣህጉራውን ጉዳያት ከምዘብቀዓ ተገሊጹ ።

ዶር ሓሰን ሓጅ ኣብ ዩኒቨርስቲ ካርቱም መምህር ናይ ፖለቲካን ተመራማሪ ፖለቲካ ናይ ዞባ ቀርኒ ኣፍሪቃን  ንጋዜጣ ኣልሰሓፋ ኣብ ዝሃቦ መብርሂ ኣገዳስነት ስርዓት ኢሰያስ ንምዕራባዊ ዓለም ብሓፍሻ ንኣሜሪካ ብፍላይ  ምስ ምክልኻል ግብረሽበራ ዝተሓሓዝ ኮይኑ,ዩ ጸኒሑ ። እዚ ከምዚ ኢሉ እናሃለወ ኣብ መንግስቲ ኣሜሪካ ኣብ መንጎ ክልተ ኣብያተ ጽሕፈታት ተቓራኒ ሪኢቶ ኣብ ልዕሊ ስርዓት ኢሰያስ ምጽንሑ ዝተፈልጠ ኮይኑ ቤት ጽሕፈት ወጻኢ ጉዳያት ኣሜሪካ ተቓውሞ እናኣስመዐ እንከሎ ብስም ምክልኻል ግብረሽበራ   ሚኒስትሪ ምክልኻል ኣሜሪካ ኩለመዳያዊ ሓገዛት ንስርዓት ኢሰያስ ክገብር ጸኒሑ ። እንተኾነ ግን ኣብዚ ሕጂ እዋን መንግስቲ ኣሜሪካ ንተራ ኣብርክቶን ስርዓት ኣስመራ ክትክእ ዝኽእል ኣማራጺ ስለዝተረኽበ ኣንፈቱ ናብ ኢትዮጵያን ዩጋንዳን ኣቢሉ ይሰርሕ ምህላዉ ኣገዳስነት ስርዓት ኣስመራ ኣብ ዞባ ቀርኒ ኣፍሪቃ ዝገልጽ ተረኽቦዩ ክብል ገሊጹ ።

 ኣብ ተመሳሳሊ ኣርእስቲ ገዲም ሓላፊ ጸጥታ ሱዳን ነበር ብርጌድር ጀነራል ሓሰን በዩሚ ኣብ ዝሃቦ መብርሂ ስርዓት ኢሰያስ ኣብ ሜዳ ኣትሒዙ ብመንግስቲ ኣሜሪካ ተቐባልነት ዘይጸንሖ እኳ እንተኾነ ብሰንኪ ንዕኡ ክትክእ ዝኽእል ኣማራጺ ዘይምርካቡ ምስናይ ኩሉ ጸገማቱ ብመንግስቲ ኣሜሪካ ተሓቒፉ ክኸይድ ጸኒሑ ። እንተኾነ ገን ኣብዚ ሕጂ እዋን ስርዓት ኣስመራ ዝነብሮ ኣገዳስነት ተባሕጚጉ ኣማራጺታቱ እናጸበበ ከይዱ ። ስለዝኾነ ድማዩ ስርዓት ኣስመራ ዝምድንኡ ምስ ሱዳን ከመሓይሽ ገደል ዝብል ዘሎ ክብል ንኣገዳስነት ስርዓት ኣስመራ ኣብሪሁ ።