ንጥገና ዝብል ቃል ከይተስሙዑና

ብተስፋማርያም ው/ጊዮርጊስ ኖርወይ 09/02/07

        ዝሕሰብ ዘሎ ጉባኤ ናይ ኪዳን ብቕንዕና ተቐራረቡ

         ንኹሉ ገዲፍኩም ንሓመድ ዝልሕስ ዘሎ ህዝቢ ሕሰቡ

          ይኣክል ተንኮል ቂም ብማይ ሰላም ልብኹም ተሓጸቡ

          መዓልትን ህግደፍን ከይተጸውዑ ስለዝመጹ ከይትስለቡ

                    ምጥጋን ምጽንጋን እናበሉ ድሕሪት ከይጎሱኹም

                    ኣስተብህሉ ብዓልመን ከም ዘለዉ ብድሕረኹም

                    ንዓኹም መሲሎም ምቁር መርዚ ከየስትይኹም

                    ምስዚ ቁንጡስ ስርዓት ዋጋዕዳጋ ከየርግጽኹም

         ብዙሕ ዓመታት ሓሊፉ ዓውደዋርሕ ክንገናጽል

         ሎሚ ጽባሕ ክሰምራየን ውድባት ሃገርና ክንብል

         ካብ ብዘይ ብቑዕ ምኽንያት ህዝቢ ለኪምካ ኾለል

         ኣብ ልብኹም ተመለሱ ውልቃዊ ህልኽ ይኣክል

                    እዞም ንጥገና ዝብሉ ዘለዉ ህግደፍ ዝለኣኾም

                    ኽስልዩን ዝመጽኡ ብጾቶም እናተኣስሩ ኪሒዶም

                    ንጮኳኒ ኣቃሊዖሞ ዘይፈልጡ ወትሩ ምልምላም

                    ኮብለል ከየብሉና ንጠንቀቕ ኣይበትኹን ርክቦም

          ንሕና ንደልዮ ነዚ ዘሎ ስርዓት ካብ ሱሩ ምልጋሱ

          ንሶም ዝጠልቡ ጠጊንካ ጸጋጊንካ ንኽሓዊ ምፍዋሱ

          ከምዚ ሓሳብ እንተቕሪቦም ርሓቑ በልዎም ኣልግሱ

          እንተዘይ ዓጀቦም ዓዶም ይኺዱ ዳግማይ ክይጣየሱ

                   ደሙን ኣዕጽምቱን ከስኪሱ ዘረከባ ጅግና ወድሓላል

                    ብሃገር ኣይትጻወቱ ይኣኽለኩም ብህዝቢ ምሽክዕላል

                    ናይ ጉዳይና ንግበር ኣይንደልን ናይ ካልኦት ምዕላል

                    ህርኩት ህዝቢ ዝነበረ ብሰንክኹም ኣትይዎ ሰንፈላል

              ቀይሕ ደምዩ ፈሲስዋ ዛተካሊት ጸበል ከይመስለኩም

              ኣብዛ ጉባአ ዚኣ ገለ ቁብነገር እንተዘይ ሰሪሕኩም

              ኣብዚ ጽንኩር ግዜ ንስምረት ቅድሚያ ተዘሂብኩም

              ኣብውሽን ኣብ ደገን ዘሎ ህዝና መዚኑ ከይንዕበኩም

                       ዘለኣለማዊ ዝኽሪ ንስውኣትና

                              ኣሜን      

Short URL: https://english.farajat.net/?p=3583

Posted by farajat on Feb 9 2007 Filed under Poetry. You can follow any responses to this entry through the RSS 2.0. You can leave a response or trackback to this entry