ቅድመኹም ይድፋኣኒ ዞም ደቀይ

ብተስፋማርያም ወ/ጊዮርጊስ ኖርወይ 10/09/06

           ኣብ ልዕሊ ወለዲ ዝወርድ ዘሎ ዘይተኣደነ መዓት

           ናትና ብዝበልዎ ዘየናሕሲ ኣረሜናዊ ስርዓት

           ንፍጫሕ መሰንገሎም ወወጢጡ ዝጠብስ ንእሳት

           ሕማም የሕዲሩሎም ንወለዲ ዘይሓዊ ጾር መንደዓት

           ኣደ ጅግና ክንዲ ካሕሳ ተፈድያ ዘይነጽፍ ንብዓት

                  ሎሚ በኣሰ ብኾንቱ ዝዓርቡ ዘሎዉ መንእሰያትና

                  ድርብ ሓዘን ኮይኑ በይና ተኾርሚያ ዘጻንዕ ስኢና

                  ተካሊት ወላዲት ትጽቢት ኣልቦ መንዩኾን ከድሕና

                  የእዛን እናሰምዐ መዓልታዊ ክፉእ እናረአ የዕንትና

                  ኣደ እናነብዐት ኣማዕዲኻ ዘጠምት መርገም ዎሪዱና

           ኮስኲስኪ ዘዕበኽዮም ለይለይ ዝብሉ ሰገናት ደቅኺ

           ሰይጣናዊ ስርዓት ኢዶም ኣይስኣኑ መንጢሎሙኺ

           ዘይወረዶ ክንደይ ከይስሞዖ ንሕሩር ውሽጣዊ ልብኺ

           ታይሞ.ገበር ኣእዊኻ ረዳኢ ዘይብሉ ሃገር ተፈጢርኪ

                  ኣማዕድያ ዝሰኣነት ምሩጻት ውላዳ ቦኽሪ ዓይና

                  ወፊሮም ከይተመልሱ ከምዘይ ኣፍረየ ማህጸና

                  ኣበይ ይህልዉ ክትብል ብሓዘን ብሓሳብ ሳጺና

                  ኣቓልቦ ዝገብረላ ተሳኢኑ ንሕናውን ጨኪና

                  ኣብ ጎንኣ ደው ከይንብል ፈሪሕና ርዒድና

           ደቀይ ስኢነ ንመንየ ዝነግሮ መንዩ ሓላፍነቶም

           ኣርድኡኒ ግዳ ደቀይስ ኣሎዉ ድዮም ሞይቶም

           ኣይቀበጥኩን ጌና ከይ ሰማዕኩ ደሃይ ሃለዋቶም

           ረሳ ኦም ከይረኣኹ ከይቀበርኩ ኣብ ጎኒ ብጾቶም

                   ኣብ ደገ ዘለኹም ኩሉ ትዕዘቡ መሳኻኽር ዓይኒ

                   ሸቐልቀል በዚሑ ዘላ ኣውኣላ ክቐብጽ ኣርድኡኒ

                   ብዘይ ደቀይ ዓለም ኮንቱ ደጊም እንታይ ክትኮነኒ

                   ባንደራ ህግደፍ ገዲፍኩም ብጸሊም ጨርቂ ቅቦሩኒ

                   ኣሰርሮም ክስዕብ ካብ ዘለኹዎ ስቓይ ሞት ትሕሸኒ

             ዝጓነፎም ዘሎ ደቅኺ ዘይፈለጥኪ ታይሞ ክትገብሪ

             ኣደየቦየ እናበለቱ ዝሰጥም ዘሎ ኣብ ሑጻ ናብ ባሕሪ

             ማሙቕ ቤትኪ ደጊም ኣትይ.ዎዩ ሰራም ሕሱም ቁሪ

             ህግደፍ ፈሪዱኪዩ ባህ ከይብለኪ ሓዚንኪ ንኽትነብሪ

             ባዕሉ የጸብቆ ካብ ሰብሲ በዂርኪ ይሓግዝኪ ፈጣሪ

                      ንዘላኣለም ዝኽሪ ንስውኣትና ኣሜን

Short URL: https://english.farajat.net/?p=2579

Posted by farajat on Sep 10 2006 Filed under Poetry. You can follow any responses to this entry through the RSS 2.0. You can leave a response or trackback to this entry