እረ ሎምስ… ብልሃቱ ጠፍኣና
ርብዒ ዘመን ኮይኑ… ፍትሒ’ና በልና
ምልኪ ይዕንድር’ሎ… ፈላሊዩ ነዓና
ይክሻሕ ብዕሊ መርዛም ‘ኣንጭዋ ናቕፋ’
***
ሓሰውትን ሰረቅትን ህግደፋዊያን ወዓጋ
ኣጣቓዕቲ ደናቑር… ናይ ሓፋሽ ሓተላ
ጽረ ሓድነት ዓያሹ… ዝሰኽሩ ብጓይላ
ደገፍቲ ጭቆና… ወንጀላዊ ጭፍራ
***
ስቃይ ስደት ክውዳእ… መሬት ክወግሓልካ
ተቓወም ብጽንዓት ምስርጣይ ደምሲስካ
***
አስላማይ ክስታናይ… ወዲ ቆላ ከበሳ
ተቃለስ ሓቢርካ… ኣድሕና ሃገርካ
********
“ወዲ ሸቃ” ተመናይ… ጥዉይዋይ ዘልቡ
ጭንቀት… ቶንከል… ዉዲት ባህሪያቱ
መሃንድስ ናይ ክፍኣት እከይ ተግባራቱ
ይደርዓም… ነድሕና ሃገርና ካብ ዝልመቱ
***
ህግደፍ ተሓቒኑ… ድምህት ወሊዱ
መኻን ምዃኑ… ኣፍሊጡ ኣግሂዱ
ተቃሊዑ’ ዮ ሎሚ ኩሉ ውዲታቱ
ጸረ ፍትሕን ሕግን’ ዩ ኩሉ ጠባያቱ
***
ውላድ “ኣንድነት”… ቀያያሪ ቆርበቱ
ለዋጢ መልክዑ.. ብዙሕ’ዮ ኣስማቱ
ቃል ኪዳን ምስ ድምህት ብዕሊ ኣሲሩ
ነጻነትና ኣፍሪሱ… ክብርና ዳህሲሱ
***
ናብራና ከፊኡ ስደት ውርደት ኮይኑ
ህዝብና ተሸቢሩ… ስቃዩ ገንፊሉ
ናብራ መሪርዎ… ንስደት ኣድሂቡ
ገዛዉቱ ራሕሪሑ መዕቆቢታት ሰፊሩ
********
ሓሳብ ይሃሉኻ… ናይ ሕልና ዓይኒ
ህዝብኻ ክውጠር ለይቲ ምስ መዓልቲ
መክት መሰላትካ ብዕዙዝ ፍናናዊ ሓይሊ
***
ቃልሲ ጀጋኑና… ታሪኽ ጽንዓት ትሪ
ይትረር ሓድነትና ይጓሓፍ’ዚ ድርባይ ስዲ
***
ንቃለስ ሓቢርና… ንፍትሒ ንለውጢ
መሰላትና ይተሓሎ… ብስርዓት ብሕጊ
ይኣክል ንበሎም… ንወዲ ሸቃ ምስ ማንኪ
ቃልስና ይበርትዕ… ከትግበር’ቲ ሕልሚ
***
ክነግድ ነጋዳይ ክቀሰን’ዚ ማሕዩር ህዝቢ
ሕጊ ክነግስ… ንቃለስ ምስ ደለይቲ ፍትሒ
ይበርቖቕ ምልኪ… ንቃለስ ሓቢርና ብግሪ
ብ/ ሙሓማድ ሳ. ኣሕመድ
04/12/2014
Comments